Aficu e seguresa/Comitadu pro sa Revisione de sos Casos/Carta

This page is a translated version of the page Trust and Safety/Case Review Committee/Charter and the translation is 98% complete.
Outdated translations are marked like this.
Other languages:
Bahasa Indonesia • ‎British English • ‎Canadian English • ‎Deutsch • ‎English • ‎Hausa • ‎Tagalog • ‎Türkçe • ‎dansk • ‎español • ‎français • ‎italiano • ‎kurdî • ‎magyar • ‎português • ‎português do Brasil • ‎sardu • ‎slovenčina • ‎čeština • ‎Ελληνικά • ‎русский • ‎العربية • ‎ߒߞߏ • ‎বাংলা • ‎ગુજરાતી • ‎தமிழ் • ‎ไทย • ‎中文 • ‎日本語
Walnut.svg
This page in a nutshell: Custa est sa carta de unu comitadu imbeniente de membros de sa comunidade cun esperièntzia chi ant a traballare pro revisionare sas atziones adatas de s'ufìtziu pro sa Aficu e sa Seguresa de sa Fundatzione (o sos issèberos de non fàghere atziones) in apellu. Custu comitadu est provisòriu finas a cando non b'at a èssere unu protzessu permanente creadu a pustis de s'acabu de sos arresonos de su Còdighe de cumportamentu universale, chi si pensat chi b'at a èssere in su 1u de ghennàrgiu.

Custa carta rapresentat sos deretos e sas responsabilidades de su Comitadu Provisòriu de Revisione de sos Casos de Aficu e Seguresa (dae como in antis Comitadu de Revisione de sos Casos).

Sa punna de su Comitadu pro sa Revisione de sos Casos est sa de traballare in collaboratzione istrinta cun su personale de sa Fundatzione Wikimedia designadu pro esaminare sos ricursos de sos impitadores interessados diretamente in sos casos serrados dae sa Fundatzione in suta de sa polìtica pro sas atziones de ufìtziu suas pro su chi pertocat sas apurias pro su perìodu de tempus chi colat intre s'istitutzione de su comitadu de revisione e s'istadu operativu cumpridu de su Còdighe de cumportamentu universale comente definidu in su decraru de su Cussìgiu in subra de sa cultura de sa comunidade 2020. Sos casos chi podent èssere esaminados dae su Comitadu de revisione de sos casos sunt cussos serrados dae sa Fundatzione cun atziones o inatziones in s'àmbitu de sa polìtica de atzione de s'ufìtziu, cun s'esclusione de sas polìticas legales, regulamentàrias, de traballu e legales comente sunt definidas dae sos abogados de sa Fundatzione. Petzi sas partes interessadas diretamente dae una santzione de s'ufìtziu o interessadas diretamente a sa presentada de una rechesta podent presentare una rechesta de revisione de su casu. Su Comitadu de revisione de sos casos at, in cussos casos in esàmene, a ratificare o mudare sos atrèmenos de s’iscuadra de Aficu e Seguresa (F&S) de sa Fundatzione, o at a pedire chi los torrent a dibatare o chi bi siant àteras iscumbatas in prus. Annotamala, ant a comunicare a sos livellos apropriados a sas partes interessadas s'èsitu de sa revisione e ant a mantènnere unu cumprou pro sa comunidade de su nùmeru de casos esaminados e de sas pertzentuales ratificadas, annulladas o torradas a protzessu pro cunsideros/iscumbatas in prus.

Sa funtzione de custu comitadu de revisione de sos casos est sa de amparare sos membros de sa comunidade dae s'aplicatzione tropu invadente, tropu severa o tropu lassista de sos istandards de ghia dae s’ala de sa Fundatzione. Su comitadu faghet de partner de sa Fundatzione pro contribuire a garantire unu tratamentu ecuànime de sas persones in casos dislindados. Su comitadu de revisione de sos casos at a tènnere atzessu a informatziones riservadas pro revisionare una sèrie de critèrios definidos a pustis, e at a èssere netzessàriu chi sos membros intrent in una relatzione legale cun sa Fundatzione pro atzèdere a custas informatziones. Pro s'amparu de sos membros de su comitadu e de sas persones interessadas in sos casos, sos membros de su comitadu no ant a èssere identificados in manera pùblica, ma ant a èssere connotos dae unos cantos membros de su personale de sa Fundatzione, dae sos consulentes de Aficu e Seguresa de su Cunsìgiu de Fundatzione e a sa Cummissione Ombuds. Totu sos membros depent èssere dispostos a respetare sos recuisitos de cunfidu e privatesa.

Punnas

Sas punnas de custu protzessu sunt cussas de:

  1. Frunire oportunidade pro una revisione intermèdia de sa comunidade pro sos atrèmenos de sos ufìtzios de sa Fundatzione in sos casos de cumportamentu in ue:
    a) sos casos non sunt istados fatos pro more de polìticas legales, regulamentàrias, de assuntzione o legales comente definidas dae sos abogados de sa Fundatzione (a esèmpiu, sos casos cumportamentales atzentrados in subra de apurias e non tzivilidade diant èssere apropriados pro sa revisione), e
    b) sa parte chi at fatu ricursu est interessada diretamente, siat comente a denuntziadora siat comente a acusada;
  2. Garantire chi sos casos retzant una revisione adeguada e chi sos voluntàrios siant tratados in manera ecuànime si retzint santziones de sa Fundatzione o si sas rechestas issoro de atziones dae s’ala de sa Fundatzione contra a calicun’àteru impitadore benint refudadas;
  3. Massimizare su gradu de trasparèntzia chi sa Fundatzione podet frunire a su Comitadu de revisione de sos casos, cun s'obietivu de cunsentire su mègius atrèmenu informadu possìbile in cale si siat recherta de ricursu;
  4. Reduire a su mìnimu s'impatu emotivu pro sos impitadores interessados diretamente frunende issèberos tempestivos in sos casos de su comitadu de revisione de sos casos;
  5. Massimizare sa seguridade de sos membros de su comitadu in lìnia cun su decraru de su Cussìgiu; e
  6. Massimizare su gradu de trasparèntzia pro sa comunidade in su cuadru de sas punnas dae 1 a 5.

Membros

Su Cussìgiu Generale de sa Fundatzione Wikimedia at a numenare unu comitadu de voluntàrios dae deghe a dòighi voluntàrios internatzionales chi ant a traballare cun su personale assignadu a su flussu de traballu de revisione. Su Cussìgiu Generale podet nominare unu o prus funtzionàrios voluntàrios internatzionales suplementares chi fetzant de membros suplentes de su comitadu pro agire in su logu e in càmbiu de eventuales membros ausentes de su comitadu voluntàriu. Sas nòminas de su comitadu durant un'annu o finas a sa creatzione de unu comitadu de revisione permanente e operativu in manera prena a sos sensos de su Còdighe de cumportamentu universale, a segunda de cale eventu s'avèrguet pro primu, o francu chi unu membru de su comitadu non rechèrgiat sa rimotzione sua o bèngiat remplasadu dae su Cussìgiu generale a discretzione sua, fintzas pro more de una rechesta de su presidente de sa cummissione. (Si pro cale si siat resone unu comitadu permanente non deperet èssere operativu a sa fine de un'annu, a sos membros de su comitadu diant pòdere pedire de sighire pro unu segundu mandadu, o lu diant pòdere pedire issos, fintzas si ant a èssere rechestos fintzas unos àteros candidados.)

Ammissibilidade de sos membros

Sos tratos chircados in sos membros de su comitadu includent s'esperièntzia de partetzipatzione a sa collaboratzione in sa comunidade e sos flussos de traballu de discussione, sa capatzidade dimustrada de valutare cuntierras complessas, sa capatzidade de amparare sas informatziones privadas e sa capatzidade de collaborare cun calma e eficatzidade cun sos àteros in sas discussiones a arriscu artu. Sas persones sutapostas a santziones ativas in cale si siat progetu in su momentu de sa dimanda non sunt ammissìbiles. Sas persones depent tènnere a su nessi 18 annos in su momentu de sa costitutzione de su comitadu. Sa ballassa in s'impreu de sa limba inglesa est de òbrigu, ca sos casos sunt iscritos in un'inglesu fatu-fatu complessu e frunire tradutziones diat èssere gastosu e proibitivu. Su personale atuale e coladu de sa Fundatzione est proibidu, gasi comente su personale atuale de sos affiliados a su movimentu.

Su protzessu de seletzione s'at a basare in subra de custos campos de esperièntzia in su movimentu, cun sa punna de otènnere diversidade linguìstica e de gènere:

  • Membru atuale o coladu de sos Stewards,
  • Membru coladu de sa Commissione Ombuds (sos membros atuales non podent èssere elègidos),
  • Membru atuale o coladu de unu Comitadu de Arbitrariadu de Wikimedia,
  • Membru atuale o coladu de àteros ruolos funtzionàrios voluntàrios,
  • Amministradore atuale o coladu de unu progetu de Wikimedia e/o
  • Contribuidore cun esperièntzia de unu afiliadu de Wikimedia.

Rechisidos

Totu sos membros de su Comitadu pro sa Revisione de sos Casos depent:

  1. Respetare sos tèrmines de custa carta;
  2. Firmare NDA dislindados de su comitadu o àteros documentas legales, comente pedidu dae s'ufìtziu legale de sa Wikimedia Foundation, pro otènnere s'atzessu a sos datos de sos casos riservados;
  3. Atzetare chi sos nùmenes de impitadore Wikimedia issoro ant a èssere cumpartzidos cun sa Fundatzione Wikimedia, cun su Cussìgiu de fundatzione,[1] sa Cummissione de su Mediatore e unos àteros membros de su Comitadu;
  4. In casu contràriu, atzetare su fatu chi s'apartenèntzia issoro a su comitadu de revisione de sos casos at a abarrare anònima e chi no ant a cumpartzire sas identidades legales o sos nùmenes impitadore de unos àteros membros de su comitadu, a su fine de amparare totu sos partetzipantes voluntàrios a su comitadu dae sas ritorsiones;[2]
  5. Sighire una sèrie de cursos de formatzione in subra de polìticas e protocollos fatos dae s'ufìtziu legale de sa Fundatzione Wikimedia;
  6. Èssere a disponimentu pro torrare a pompiare sos casos in antis a su comitadu de revisione de sos casos finas a chimbe oras setimanales pro parte manna de sas chidas pro sa durada de s'apuntamentu issoro leghende sos fascìculos de sos casos Aficu e Seguresa (Trust & Safety) chi esistint (non pro mèdiu de iscumbatas indipendentes), cun su prus mannu preavisu possìbile de indisponibilidade imminente;
  7. Informare deretu su Cunsìgiu Generale si s'agatant sugetos a santziones comunitàrias durante su mandadu issoro. Sas santziones non sunt resones automàticas de esclusione, ma giustìficant sa revisione de su cussìgiu; e
  8. Informare su Presidente de su Comitadu e su Cussìgiu Generale si in cale si siat momentu li benit pedidu de torrare a esaminare unu casu pro su cale retenent de pòdere tènnere una cuntierra de riellos (che a una relatzione istrinta cun una persone interessada in unu casu) pro s'avaloramentu de s'adeguadesa de Incàrrigu issoro. Sos indivìduos sunt incoragidos, imbetzes, a no atzetare s'incàrrigu si ischent de s'esistèntzia de unu problema de custa genia (positivu o negativu chi siat) o si sunt istados coinvoltos in sos detàllios de su casu.

Responsabilidades

Mascamente, sas responsabilidades de su comitadu incluent:

  1. Nòmina de unu presidente de cummissione cun votu. Sos còmpitos de su presidente cumprendent sa garantzia chi a su nessi chimbe membros de su comitadu siant assignados a cada esàmene de su casu, cun s'obietivu de tènnere esperièntzias, istòrias e provenièntzias diferentes assignados a cada casu, e garantire chi sos membros de su comitadu siant ativos cantu netzessàriu pro satisfàghere sas doveres issoro.
  2. Cun su suportu de comunicatzione frunidu dae sa Fundatzione, mantenende una presèntzia de su Comitadu de revisione de su casu in Meta pro mèdiu de unu contu impitadore de ruolu, fruninde
    a) Informatziones generales in subra de su comitadu de revisione de sos casos, chi amparent s'anonimadu de totu sos membros sìngulos e descrient a sa minuda sas cualìficas pertinentes de sos partetzipantes in tèrmines generales bastantes pro mantènnere cussu anonimadu;
    b) sa carta de su comitadu de revisione de sos casos e sas informatziones generales in subra de su protzessu;
    c) Informatziones de cuntatu pro rechestas de revisione;
    d) Agiornamentos procedurales de sos casos chi pertocant a sas datas de abertura e serrada de sos casos in antis a su comitadu de revisione de sos casos (in forma agregada; sos casos sìngulos sutapostos a revisione no ant a èssere identificados, francu in casu chi sas santziones bèngiant annulladas); e
    e) contègios complessivos de su nùmeru de casos ratificados cunfronta a su nùmeru de casos modificados a pustis de sa revisione.
  3. Rivelare in presse sas rechertas de revisione pro un'esàmene de idoneidade a su Responsàbile legale assignadu.
  4. Isseberare chimbe membros de su comitadu pro torrare a pompiare cada fascìculu ammissìbile pro determinare a majoria simpre, in intro de 9-11 dies de sa nòmina de sos chimbe membros, si:
    a) Sos casos sunt istados manigiados in manera apropriada dae sa Fundatzione in logu de èssere torrados a imbiare a sos protzessos de sa comunidade locale,
    b) S'iscuadra Aficu e Seguresa at collidu proas sufitzientes pro valutare sas acusas a intro de sos paràmetros de respetu de sa seguresa de cale si siat informatzione riservada,
    c) S'iscuadra Aficu e Seguresa at determinadu in manera curreta in base a sas proas collidas si su cumportamentu descritu in su raportu si cualìficat o nono che a una violatzione de sa polìtica pertinente, e
    d) Sas santziones emìtidas dae s'iscuadra de Fidùtzia & Seguresa (o s'issèberu de no emìtere santzionas) sunt apropriadas a sas tzircustàntzias de su casu,
  5. A pustis de àere isseberadu de ratificare o ribaltare unu casu o nono, o de lu torrare a imbiare a sa revisione o de pedire iscumbatas in prus, comunichende custu issèberu a su Cussìgiu Generale pro s'aprovatzione formale e, a pustis, a sas partes apropriadas interessadas de unu casu.
  6. Riunione cada tres meses de totu su comitadu pro arresonare de sa funtzione de su comitadu e racumandare megioros a su sistema, e si netzessàriu, àteros addòbios pro dibatere de sa serrada de casos complessos a intro de sa tempìstica essentziale.

Ammissibilidade a sa revisione e paràmetros de atzione

Petzi sas persones interessadas diretamente dae unu casu podent pedire una revisione, siat che a pedidore siat che a indivìduu in suta de inchiesta. Petzi sos casos chi intrant in s'àmbitu de Aficu e Seguresa, a sos sensos de sa polìtica de atzione de s'ufìtziu de sa Fundatzione, podent èssere esaminados. Si s'iscuàdra de Fidùtzia & Seguresa refudat de indagare in unu casu, rinviende·lu a sos protzessos de sa comunidade, no est idòneu pro sa revisione in s'àmbitu de custu protzessu.

Unos cantos casos de s'ufìtziu non sunt idòneos pro sa revisione. Sos casos esclùdidos sunt cussos nàschidos pro more de polìticas legales, regolamentàrias, de su traballu o legales comente definidas dae sos abogados de sa Fundatzione. Unu procuradore de sa Fundatzione at a compidare cada casu presentadu in ue b'at unu ricursu in antis de cunsinnare sos fascìculos a su comitadu. Si unu casu faghet parte de sas esclusiones, s'abogadu at a ispiegare su pro ite a su comitadu de revisione e su comitadu at a notificare sa limitatzione a su pedidore. In totu custos casos, sos atrèmenos de sa Fundatzione non sunt sugetos a ricursu e sos documentos de sos casos non podent èssere cumpartzidos pro sa revisione.

S'organismu de revisione de su casu non tenet s'autoridade de emìtere santziones, ma podet ribaltare sos atrèmenos de interventu de s'ufìtziu de sa Fundatzione cando chi lu retèngiat oportunu o imbiare unu casu pro iscumbatas in prus. Sas santziones eventuales aplicadas benint mantentas durante sas àteras iscumbatas, ma sas santziones annulladas ant a bènnere annulladas in su primu momentu chi sa Fundatzione at a èssere in gradu de lu fàghere. Si su Comitadu de Revisione de sos Casos determinat chi unu casu serradu chene carchi atzione diat àere dèpidu cumportare un'atzione, l'at a torrare a imbiare a s'iscuadra de Aficu e Seguresa pro propònnere atziones a su Cunsìgiu Generale pro mèdiu de su protzessu normale. Su comitadu de revisione de sos casos at a èssere consultadu pro esaminare sos casos torrados a imbiare pro atzertamentos in prus o santziones noas o prus severas in antis de s'acabu de su casu de Fidùtzia & Seguresa. Sas santziones mudadas non sunt un'aprovatzione automàtica de su cumportamentu de un'indivìduu interessadu, ma podent derivare dae su resonamentu chi sa chistione diat àere dèpidu èssere manigiada a livellu de sa comunidade. In cussos casos, su problema podet èssere sutapostu a revisione pro sa revisione de sa comunidade, in ue esistet un'òrganu apropriadu pro lu revisionare (fintzas si chene atzessu a sos documentos de su casu de s'iscuadra de Aficu e Seguresa).

Durada de su comitadu interinale

Su Comitadu interinale de revisione de sos casos de Aficu e Seguresa est istadu istituidu cun s'aspetativa chi at a èssere remplasadu dae unu protzessu permanente in intro de su 1u de trìulas de su 2021. Est possìbile chi su protzessu intermèdiu at a divènnere sa base de unu protzessu permanente cun una revisione adeguada e unu perfetzionamentu de sas polìticas chi pertocant a s'isvilupu e a pustis de sos arresonos a pitzu de su Còdighe de cumportamentu universale in cursu. Si unu protzessu permanente no est prontu a lu remplasare in antis de su 1u de trìulas de su 2021, su comitadu interinale de revisione de sos casos de aficu e seguridade podet èssere mantentu cun unu àteru invitu a presentare candidaduras o su Cussìgiu generale podet atuare un'estensione una tantum de su comitadu pro unu màssimu de ses meses, si si pensat chi su protzessu permanente diat pòdere èssere acabadu in intro de sa fine de cussa pròroga.

Su traballu de su comitadu si diat pòdere suspèndere si b'ant a èssere un'essida de informatziones in subra de sos casos o de s'identitade de sos membros, e b'at una resone credìbile pro pensare chi s'essida bèngiat dae intro a su comitadu.[3] Sa Fundatzione at a bogare cale si siat membru chi bengiat cunsideradu responsàbile pro fàghere essire informatziones e diat pòdere fàghere atziones in prus, fintzas de ufìtziu, si s'essida de infrormatzione s'at a iscobèrrere chi siat intentzionale. A pustis de s'isorvidura de sa chistione de s'essida de informatziones e a pustis chi sas informatziones protzessadas dae su comitadu ant a èssere torra seguras su comitadu at a sighire cun su traballu suo.

Notes

  1. Su Presidente, su Vitze-presidente e su Pesidente de su Comitadu de su Produtu, chi frunit impòsitos fintzas pro su traballu de Aficu e Seguresa in intro de sa Fundatzione
  2. Sos membros diant pòdere isseberare de rivelare sas identidades issoro, ma non s'identidade de àteros membros, a pustis de ses meses dae s'essida issoro o dae s'isorvimentu de su comitadu.
  3. Si s'essida de informatzione est originada dae intro a sa Fundatzione su comitadu diat pòdere no èssere suspèndidu, e s'essida diat èssere afrondada sighende sas protzeduras disciplinares pro su personale.

Preguntas fitianas

P. Proite sos membros de sos comitados sunt anònimos?
R. S'amministratzione de sa comunidade cumportat arriscos medas, intre sos cales b'at un'arriscu de ritorsiones dae s'ala de sas persones delùdidas dae sos resurtados de sa revisione de su casu (fintzas dae s'ala de cussos chi sunt in informados petzi chi su casu issoro no est ammissìbile a sa revisione, a esèmpiu ca est de natura criminale) e un'arriscu de pressione pro espònnere informatziones privadas, fintzas pro mèdiu de organizatziones o guvernos esternos ostiles. Pro sa seguridade de sos membros de su comitadu interinale e pro sa seguridade de sas persones interessadas dae sos casos, sa Fundatzione at a rechèrrere custu anonimadu pro reduire custos arriscos. Nointames, sos membros de su comitadu ant a èssere identificados dae sa Cummissione Ombuds de sos difensores tzìvicos, unu grupu minore fidadu de funtzionàrios de sa comunidade, chi podet cunfirmare minujas generales in sa cumpositzione de su comitadu.
P. Chie at a revisionare custas aplicatziones?
R. Unos cantos stewards chi non si cherent candidare ant atzetadu de revisionare sas dimandas pro agiudare a valutare s'idoneidade a serbire in cussu ruolu. S'issèberu finale intre sos candidados chi ant a retènnere ammissìbiles at a èssere fata dae su Cunsìgiu Generale.
P. Cale sunt sas règulas isseberadas pro amparare sa riservadesa de sas persones chi presentant ricursos a s'iscuàdra de Aficu & Seguresa o sunt acusadas de àere commitidu un'errore?
R. Fintzas pro revisionare sos documentos de su casu, su comitadu de revisione de sos casos at a dèpere intrare in una relatzione legale cun sa Fundatzione Wikimedia chi lis cunsentit de cumpartzire in seguridade custu materiale. Sos documentos legales chi ant a firmare ant a incluire fintzas un'acòrdiu de non divulgatzione ispetzìficu meda. Custos documentos legales ant a èssere publicados a pustis chi ant a èssere cumpletados de manera chi sas comunidades potzant bìdere sos tèrmines.
P. Ite tipologia de casos podet esaminare custu comitadu?
R. Custu comitadu est in gradu de torrare a esaminare sos casos atzetados dae s'iscuadra de Aficu & Seguresa pro s'avaloramentu, in base a sas polìticas suas, chi non sunt sighidos pro more de polìticas istatutàrias, regolamentàrias, chi pertocant a sas polìticas de su traballu, o legales. Unu procuradore de sa Fundatzione at a determinare cale sunt sos casos chi podent presentare ricursu. Sa punna de sa revisione est sa de frunire garantzias de adeguadesa e curretesa pro sos chi sunt istados definidos casos "de làcana" ("borderline") de apurias e intzivilidade, cosa chi incluet sos casos chi diant àere pòdidu èssere lassados a sos protzessos de amministratzione de sa comunidade. Sunt esclùdidos sos casos in ue sos abogados de sa Fundatzione valutant un'òbrigu legale de agire. Sos membros de su comitadu no ant a tènnere atzessu a cussos documentos.
P. Su comitadu de revisione de sos casos at a èssere in gradu de esaminare sos casos prus betzos?
R. Su comitadu de revisione de sos casos diat pòdere torrare a esaminare cale si siat casu ammissìbile gestidu dae s'iscuadra Aficu & Seguresa in manera indipendente dae su fatu chi su casu siat istadu serradu in antis o a pustis de sa data de costitutzione de su comitadu. Cale si siat casu podet èssere esaminadu una borta ebbia. S'inghitzu de su riesame de unu casu tenet bisòngiu chi un'indivìduu siat interessadu diretamente in unu casu, siat chi siat istadu su chi at pedidu de l'abèrrere siat chi siat istadu su sogetu de su casu.
P Comente a at a funtzionare custu comitadu? Ite ant a èssere sas fainas suas, de pretzisu?
R. Custas informatziones sunt galu in fase de isvilupu e ant a èssere acabadas d preparare in consultatzione cun sos membros de su comitadu. Nointames, previdimus de creare unu contu ispetziale pro custu comitadu pro retzire dimandas de apellu chi siat atzessìbile dae s'ala de su presidente de su comitadu e dae un'apaltadore frunidu pro suportare su comitadu cun sas comunicatziones suas e sos documentos suos.
P. Chie, in sa Fundatzione Wikimedia, at a connòschere s'identidade de sos membros de su comitadu?
'R.' Su Diretore Esecutivu, su Cussìgiu Generale, su Vitze Cussìgiu Generale, su Consulente Sèneghe a suportu de su comitadu, su Vitze Presidente pro sa Resilièntzia e sa Sostenibilidade de sa Comunidade e s'apaltadore assuntu pro suportare su traballu de su comitadu ant a tènnere atzessu a s'elencu finalizadu de sos chi b'ant a pigare parte. Fintzas su personale legale agiuntivu netzessàriu pro suportare sa finalizatzione e sa presentada de sos acòrdios firmados podet tènnere atzessu a custas informatziones. Totu custas persones sunt (o in su casu de s'apaltadore at a èssere) in suta de un'acòrdiu de cunfidu cun sa Fundatzione e connoschente sas responsabilidades issoro in su de mantènnere riservadas custas informatziones. In prus a custa, non b'at como peruna intentzione de cumpartzire custas informatziones cun àteru personale e apaltadores de sa Fundatzione; masaprestu, sunt istadas pigadas medidas pro isulare custas informatziones, fintzas dae sas persones chi traballant in s'iscuadra Aficu e Seguresa de sa Fundatzione. Diant pòdere essire a campu resones chi ant a rechèrrere chi su personale agiuntivu bèngiat postu a connoschimentu de s'identidade de custas persones, e duncas s'acòrdiu recheret chi sos membros de su comitadu autorizent su cumpartzimentu de custas informatziones cun sa Fundatzione in generale. Sos abogados de sa Fundatzione depent abarrare mujaditos pro suportare e amparare su comitadu e sa comunidade e ant a determinare si est netzessària una divulgatzione interna agiuntiva de sa Fundatzione. Sos membros de su comitadu ant a èssere avèrtidos si sas identidades issoro depent èssere cumpartzidas cun unos àteros membros de su personale o incarrigados dae sa Fundatzione e pro ite.