香港維基社群用戶組/友善空間政策

本頁雖然有其他翻譯版，但係如果同英文版有差異嘅話，就以英文版為準。

友善空間政策

政策原則

爾項友善空間政策適用於香港維基社群用戶組（本組）搞嘅任何活動、聚會、編輯松同外展活動。爾項政策係用來補足而唔係取代維基媒體活動嘅通用友善空間方針，同埋維基媒體運動同本組嘅其他政策同慣例。

香港維基社群用戶組（本組）致力於建構友好同零騷擾嘅氣氛，等咩人都好，無論年齡、性別、性取向、性別認同或表現、殘疾、外表、身材、種族、族群、政治聯繫或宗教（包括但唔止爾啲）都可以有友好而零騷擾嘅活動經驗。本組絕對唔容許任何活動參與者做出任何騷擾行徑。活動參與者無論喺咩活動、工作坊或者社交活動都好都應該恪守爾啲規矩。

活動參與者嘅禁止行為

凡參加本組舉辦嘅活動，活動參與者嚴禁做出任何騷擾、歧視或者辱罵行徑。騷擾、歧視或者辱罵行徑包括但唔限於︰

• 發表歧視言論，包括就年齡、性別、性取向、性別認同或表現、殘疾、外表、身材、種族、族群、政治聯繫或者宗教畀出啲帶有冒犯性質嘅言論。
• 威脅行為，包括：蓄意威嚇、纏擾、跟蹤、未經拍攝對象明確同意而擅自拍攝、會整傷人或者對方唔想要嘅身體接觸、持續干擾會談或其他活動嘅進行，或任何其他意圖威脅、脅迫或者恐嚇嘅言論或者行徑。
• 性相關行徑，包括：非禮、性騷擾行徑、性暗示言論或身體動作、不當嘅性要求，或其他任何同性相關嘅言語或行徑。
• 展示不當同性相關嘅內容或影像，或者無充分預告之下展示其他冒犯他人或令人不安嘅內容。
• 干擾任何演說、節目或活動。
• 持續侵擾香港用戶組活動嘅參與者或選擇參與者嘅私人生活。
• 任何其他違反維基媒體活動一般友善空間方針、任何其他香港用戶組政策，或違反香港法律嘅行為。

當有人要求咗參加者唔好再做爾啲行為嘅時候，參加者就必須立即服從，唔可以再做嗰啲行為。

受禁制人士

任何人如果

• 受緊維基媒體基金會活動參與禁制；或者
• 受緊維基媒體基金會或社群全域編輯禁制；或者
• 有維基媒體項目帳戶，而爾啲帳戶因擁有者濫用編輯權限，受緊全域鎖定，或者喺任何一個或多個維基媒體項目上邊受緊永久封禁或者禁制；或者
• 因為違反爾個政策而被禁制參與由香港用戶組舉辦嘅活動，

咁喺之前講嘅嗰啲禁制期限屆滿之前，嚴禁參與一切由香港用戶組舉辦嘅活動。

要落實執行爾個政策，香港用戶組同其活動組織者應該要有一份香港用戶組活動禁止參與者名單。

政策實施

活動組織者有責任確保爾個政策得到落實執行。如果有需要，活動組織者喺執行爾個政策嗰陣，可以搵活動場地人員或者警方幫手。

如果活動工作人員對在場人士嘅行為有疑慮，或收到投訴，工作人員就應該適當咁去處理個情況。處理方式可以包括對嗰個人私下警告，要求佢改變行為；如果情況嚴重，工作人員可以要嗰個人立即離場。如有跟蹤行為嘅情況出現，工作人員或者可以協助安排護送。

任何人持續做出違規行為，一經香港用戶組共識議決，就可以禁制參與其他香港用戶組舉辦嘅活動。

因為香港用戶組活動係由志願者管理嘅，活動組織者需要所有與會者協助執行爾個友善空間政策。 如閣下受到騷擾，或留意到有其他人受到騷擾，或有任何其他疑慮，請立即聯絡活動工作人員。

2019年5月22日起生效