Wikimedia Community User Group Malaysia/Reports/WikiBudaya Kaamatan 2023

Ngaran Abaabayan

Kotindapahan Kelab Wiki Institut Pendidikan Guru (IPG) Kampus Kent x Wikimedia Malaysia id longkod Kadazan Dusun Cultural Association (KDCA) toun 2023.

Kaampayatan Momomoguno

Tudu

Pendigitalan boros om koubasanan tinaru doid booyungan Dusunik maya nunu i nokito om noilaan id KDCA.
Mongilo om mondokumentasi do koubasanan tinaru Kadazandusun miagal ko rasuk, sayau, koinusan om suusuai po.
Momoruhang boros Kadazandusun id Wikikamus maya do muhot tulun ginumuan miampai magalap diolo dumadi do puru id Wikimedia.
Popointutun do Wikimedia kumaa tulun ginumuan.
Popoilo om monuduk kumaa tulun ginumuan kokomoi poingkuro momoruhang boros Kadazandusun toi ko' boros-boros mantad tinaru suai id suang do Wikikamus.
Monimung hogot-hogot id Boros Kadazandusun om posuangon id WikiKamus mooi do amu atagak o boros diti.

Aasil

Aasil di naanu mantad do kotindapahan id kalamaian kapanaandakan do Kaamatan toun 2023 id Hongkod KDCA nopo nga nokokito ogumu kaantakan i pointarad do koubasanan tulun tinaru Kadazandusun miagal ko:

Rasuk Koubasanan
Sayau Koubasanan
Pialaan Unduk Ngadau
Taakanon Koubasanan
Tinunturu Koubasanan
Kakamot koubasanan
Walai Koubasanan tumanud Watas om suai-suai po.

Asil ontokon	Asil nagampot	Kotolinahasan
Popoilo kumaa tulun ginumuan kokomoi Wikipedia lobi-lobi no Wikikamus.	Kaanu pinopoilo om pinopointutun Wikikamus diti kumaa soginumu tulun om nakaanu nogi minongukab akaun wagu id suang do Wikikamus.	Laang nopo pinopoilo om pinopointutun Wikikamus diti nga' maya do ponorubungan miampai tulun ginumuan ii nokorikot id karamayan Tadau Kaamatan id KDCA diti. Suai ko iri, pinopintikid nogi flyer kokomoi do Wikikamus diti. Ontokon nopo kopio montok popoilang diti Wikikamus nga' kumaa do tulun mantad mogisuusuai tinaru om nogi komulakan.
Maganu gambal koubasanan montok monikid tinaru om nunu-nunu nopo koubasanan di okito.	Nakaanu minaganu soginumu gambal kokomoi koubasanan miagal do rasuk koubasanan, walai, suang id walai, kakamot, taakanon koubasanan, sayau om ogumu po.	Montok maganu gambal diti, minimpanau yahai tinumutuk id KDCA, toi ko' lobi spesifik nopo nga' id Cultural Village montok mogihum koubasanan-koubasanan diti. Soira maganu do gambal, mokianu po yahai kasagaan mantad di sanganu. Suai ko' iri, moguhot nogi yahai ngaran-ngaran miagal do kakamot, aksesori basaan om ogumu po soira au no oilaan.
Monimung do hogot toi ko' boros wagu.	Nakaanu monimung soginumu boros wagu mantad mogisuusuai tinaru.	Boros wagu diti nopo nga' naanu mantad do ponorubungan miampai tulun di lobi abaal kumaa boros dii. Kogumuan nopo ponorubungan nga' miampai do komolohingan tu' lobi abaal kumaa boros diolo sondii. Soira do monorubung, muhot nogi yahai do rati di boros, ralan mongija' om ralan kopomolombusan boros dii.

Nawawayaan

* Poingkuro kou tinumounda montok ababayan diti?

1. Papaharo pitimbungakan miampai surupu id tinimungan dahai om nogi i Totu Taufik i mananapanai dahai doid ababayan diti montok mogiboboros kokomoi kopoindalanan ababayan kaampai no nunu i minog dahai do potoundaon pogulu mongoi hilo KDCA, nunu i nuru daa poindalanon dasom kotindapahan dahai do hilo om nogi nunu i maan powonsoyo alapas ababayan diti.

* Nunu ngaawi o kaantakan doid ababayan diti?

1. Ogumu kaantakan i notoguangan dahai ontok ababayan diti miagal ko' nokokito om nokopinsingilo yahai kokomoi koubasanan mogisusuai etnik id siriba booyungan Kadazandusun om Murut om nokoruba nogi tulun mantad mogisusuai tadon.

* Haro nangku kaantakan di kohiok (interesting) dasom ababayan diti?

1. Kinorikatan do Luguan Montiri Malaysia Datuk Seri Anuar Ibrahim id KDCA montok popoimagon karamayan Kaamatan toun 2023. 2. Nokoruba yahai di Isaac Voo, tulun mantad Sabah i nosiliu modsisinding hilo id Korea.

* Nokosimban nangku topurimanan nu doid kouhupan id suang Wikimedia toi ko toilaan osinggawa alapas ababayan diti?

1. Nokosimban tu ogumu koilaan om nawawayaan di naanu dahai maya ababayan diti i kaanu manahak do tapanai, kagarasan om ponginsanangan soira momoruhang kawagu toilaan osinggawa doid Wikimedia. 2. Kopuriman yahai kapansalan do popodokumentasi diti boros om koubasanan mooi au atagak gama koundolihon timpu om koburuon teknologi. Osiliu nogi daa o asil mantad ababayan diti sabaagi susukuon tulun ginumuan.

* Pinoilang nangku dokoyu o nawawayaan doid ababayan diti kumaa isai nopo?

1. Pinoilang dahai nawawayaan doid ababayan diti kumaa piipiro koombolutan id IPG kaamapai no poingkuro yahai minopoindalan ababayan pendigitalan, tantaman di notoguang dasom poindalanan ababayan dilo, kowowoyoon posorili om suusuai po.

Pinsingilaan

Kapapanahon nopo toisoiso projek nga au i katanud kopio miamapai nunu i napalan mantad no. Kopoilangan kokomoi nunu i noilaan kaanu monguhup dia om palan kokomoi kopoindalanan projek di miagal-agal id timpu dumontol. Uhupai o tingkono minsingilo mantad nawawayaan miampai monimbar poguhatan id siriba:

* Nunu i nokoindalan miampai osonong toi ko nakalantoi?

1. Kaanu mongintutun piipiro koubasanan etnik id booyungan KDMR miagal do basaan koubasanan, kakamot koubasanan, sayau, boros om suusuai po.

2. Kaanu popointutun do Wikipedia kumaa piipiro tinimungan etnik id booyungan KDMR.

3. Kaanu maganu gambal-gambal koubasanan montok poruhangon id Wikimedia Common.

4. Nakaanu momoruhang hogot-hogot doid Boros Kadazandusun id WikiKamus.

5. Nakaanu kosiwatan do mintong om momurimon sondii kouyuuyuo' karamayan Kaamatan id KDCA.

* Nunu i au songkuro osonong toi ko nakalantoi o kopoindalanan?

1. Au ogumu boros di noilaan mantad mogisuusuai etnik tu atangkangau yolo monoina do ababayan sondii.

2. Au songkuro ogumu gambal om video i naanu.

3. Aiso tionon di oliwawos montok monuduk poingkuro ralan poposuang boros id Wikikamus.

4. Kiwaa tulun di au koilo ngaran do koubasanan-koubasanan sondii miagal do basaan hali pia poimpakai diolo maso dii.

5. Gambal om video koubasanan di naanu nopo nga amu songkuro osonong o kualiti dau.

* Nunu ponginsanangan toi ko maan nu simbanai ontok timpu dumontol?

1. Potounda mantad do iso katayadan do tinimungan boros tumanud laras mooi ouhan papadalin kumaa boros di gunoon etnik pointantu.

2. Molos toi ko' potounda do kamera di osonong o kualiti.

3. Mogihum ponginsamakan di kibagas montok popointutun Wikipedia kumaa tulun ginumuan loolobi kopio i sukod wagu.

4. Popotounda booth pameran montok monginsong popoilo poingkuro karalano momoguno Wikipedia om momoruhang boros id Wikikamus.

5. Mogihum sosongulun di abaal doid koubasanan tinaru sondii.

Kousinan

Garan Kinopomogunoon Kousinan

Panahak kointalangan kokomoi ginumu tusin di noguno om nunu kinogunoon tusin dii.

Ginumu nopo tusin di noguno nga RM 1172.50 au po nokohompit i kousinan sondii.

Katayadan kinogunoon do tusin

1. Badge Keychain - RM250

2. Flyer - RM150

3. Taakanon - RM 300

4. Kaad kointutunan - RM 2.50

5. Rasuk - RM 210

6. Tambang do bas - RM 260

Komen montok do kousinan

Toud kousinan montok toinsanan kinogunoon do tusin i pinatayad id sawat nopo nga mantad do Wikimedia.

Gambal abaabayan:

Suusuai po

Alansan da do goos pinopoilang Wikipedia diti id KDCA kaanu mongukab mato tulun ginumuan kokomoi koponguhupan Wiki diti id suang do mantamong koubasanan gisom do au atagak. Alansan oku nogi daa do platform diti lobi koingkawas om koinlaab moi do kaanu manahak kasanangan kumaa tulun ginumuan suai tadau. Pounsikou!