User:Whatamidoing (WMF)/New beta feature/ast
Resume: Hai una Carauterística Beta opcional nueva d'un mou de testu wiki pal editor visual. Pruébala.
La xente del Departamentu d'edición de la Fundación Wikimedia somos responsables d'ameyorar la edición pa tolos editores, tanto los nuevos como los espertos. Pali que pali, tamos ameyorando l'editor visual basándonos nos comentarios, pruebes d'usuarios, y pidimientos de carauterístiques. Sicasí, eso nun satisfai toles necesidaes de los usuarios: si necesites editar una páxina d'alderique de testu wiki, crear una plantiya, o iguar los problemes de sintaxis d'una referencia frañada. Dacuando ye necesario usar testu wiki, y munchos editores espertos prefieren-lu.
Arriendes d'ello, tamos planificando cuantayá un «mou de testu wiki» pal editor visual. Ufre tantes funciones del editor visual como ye posible, pa eses ocasiones nes que precises o desees editar el testu wiki. Tien la mesma interfaz d'usuariu que l'editor visual, incluyendo la mesma barra de ferramientes enriba, colos mesmos botones. Da accesu al serviciu citoid pa dar formatu a les cites, tien funciones de gueta integraes pa insertar imáxenes y la posibilidá d'amestar plantiyes nueves con un diálogu cenciellu. Lo mesmo que nel editor visual, si pegues testu con formatu copiáu d'otra páxina, el formatu (como les negrines) va tresformase automáticamente'n testu wiki.
Toles wikis agora tienen accesu a esti mou como Carauterística Beta. Si s'activa, troca l'editor de testu wiki esistiente en tolos llugares. Si nun te gusta, puedes dar marcha atrás en cualquier momentu desactivando la función Beta nes preferencies. Nun deseamos sorprender a naide, de mou que ye una función Beta puramente opcional. Nun se va activar automáticamente pa naide, inclusive si activasti antes la opción «Automatically enable most beta features».
El nuevu mou d'edición de testu wiki ta basáu nel editor visual y, polo tanto, rique JavaScript (lo mesmo que l'editor de testu wiki actual). Nun funciona con accesorios diseñaos sólo pal editor anterior (y viceversa), de mou que dellos usuarios echarán en falta accesorios que consideren importantes. Préstanos trabayar colos criadores de los accesorios p'ayudalos a actualizar el códigu pa que funcione con dambos editores. Nun tamos planiando desaniciar l'editor actual de testu wiki d'escritoriu nun futuru previsible. Tampoco nun vamos desaniciar la posibilidá actual d'editar testu wiki ensin usar JavaScript. Finalmente, anque nun tendría de ser necesario indicalo, si desees siguir usando l'editor de testu wiki actual, puedes faelo.
Esta ye una versión temprana, y gustaríanos saber lo que pienses por que podamos ameyorala. Dexa les tos impresiones sobro'l nuevu mou d'edición na páxina de comentarios. Puedes escribir comentarios en cualquier idioma. Gracies.